Psa 8 | YomNWM | STEP | Nkunga Davidi kuidi pfumu minyimbidi mu ngitala yi basi Ngati. Yave, Pfumu eto ! Tala buevi dizina diaku didi di nzitusu va ntoto wumvimba. Ngeyo wutula nkemboꞌaku viokila diyilu.

Psalms 8

Bunneni bu Nzambi ayi bunneni bu mutu

Nkunga Davidi kuidi pfumu minyimbidi mu ngitala yi basi Ngati.

1 Yave, Pfumu eto !
Tala buevi dizina diaku didi di nzitusu va ntoto wumvimba.
Ngeyo wutula nkemboꞌaku viokila diyilu.
2 Mu bididi bi bana balezi ayi bi bana batsombi,
ngeyo wutuma mu totukila nzitusu
mu diambu di bambeni ziaku ;
mu diambu di kanga miunu mi bobo beti ku lenda,
ayi mutu wowo wumvutulanga mambimbi mu mambimbi.
3 Bu ndieti tala diyilu diaku, kisalu ki minlembo miaku,
ngonda ayi zimbuetete ziozi wutula va buangu ;
4 buna mbi biobi mutu mu diambu wuntebukilanga moyo,
ayi muana mutu mu diambu wumbelanga mayindu e ?
5 Ngeyo wumvanga kaba fioti ku tsi bivangu bi diyilu ^{▼▼Tsekodolo yinkaka : Nzambi.}
ayi ngeyo wumvuika nkembo ayi nzitusu,
6 Ngeyo wunkitula nyadi mu
bisalu bi mioko miaku,
ngeyo wutula bima bioso ku tsi malu mandi :
7 mamemi moso ayi zingombi zioso ;
bibulu bioso binsitu,
8 zinuni zi yilu ayi zimbizi zi mbu,
bibioso bindiatilanga mu minsolo mi mbu.
9 A Yave, Pfumu eto !
Tala buevi dizina diaku didi di nzitusu va ntoto wumvimba.